حالة استراحة بقلم : إسماعيل محمد إسماعيل عرض صفحة الكاتب العودة الى صفحة المقالات حالة استراحة , ليست للإسترخاء و باللغة الدارجة عندما يكون أمامنا ( عنكود ) أو ماعون عنب ، نبدي بالجبيره الرايجة و نعوف الزغيرة و بالنتيجة حتى الزغيره ما تظل !!! قبل أيام ـ و يجوز بعده و آنه ما أدري ـ مَر عيد القيام أو القيامه ـ اللي أتمناه استراحه ساره لكل العالم , و القيامه قايمه بالعراق ـ كلت خلي آخذ استراحة من تعب النفس مثل ما جانوا الجنود خلال الحربين العالميتين و الموت امسوّي بالناس فلَك , ما نسوا الفن ( الغنه و الركص و المسرح و الشعر و الرسم و كتابة المذكرات أو الذكريات و رسائل الأهل و الأحباب ) . ما جاب هذا على بالي لكيت قصاصات ورق عليها رسائل تلفون إرسال و رَد أو بس إرسال كلت خل اقدم هذا العنكود ويجوز بعض الأصدقاء يشوفونه كرزات حسب الحالة !! المثلي والأحسن إذا تفضلوا و سلّسوا أكيد راح ارتاح و اكون ممنون و اليدير وجهه ما أتمناه خسران , رسالة إجتني أو ( إجَتّي ) : إرهابي ليش تصير ؟ .. مو إنتَ حباب فجرته كلبي شبيك .. سويته عطّاب ؟ الرد : مرعبني كلبج جان ... وَن و ضَنا و آه فجَّرته , بس ملعون ... فجّرني وياه !! رسالة وارده : هاك اخذ رمش العين ... خيّط جروحك واتبادل آنه و ياك ... روحي اويه روحك الرد : رموش البشر و الجان .. نفذه اويه جرحي و شلون ابادل شوج روحي , اويه برحي وارده : كيمر عسل مخبوط .. شلون الله سوّاك ؟ للصبح يعجن بيك !!.. لمن صرت صاك !! الرد : شعيري آنه صار اوياج .. ياكل حنطْتي بلوك آنه لو طابوك ؟ .. و تصِك خبُطتي ؟!! ..... الكيمر لوحده حلو , و ويا عسل شِنكول ؟ محروس بالله الحلو , اسم الله اعله هذا الطول واردة دورها روحك زين ...تلكاني بيها يالشوفتك بالروح ... و الله اشتريها الرد : حسبالج انتِ هناك .. وهنانه آنه ؟ فر كلبي طير و طار وانتِ بمكانه مُرسله أو ( مودّايه ) !! ريت الله يكلب كون ... ديره اعله ديره بلكي الكه بيتي يصير يمكم مصيره !!! ..... ما عندي و لمه وياج يالصفنه روحي تتماطل اويه الشوك ملتَهْيه روحي رسائل ( مكيطيفات ) على ما كال المرحوم الشاعر العْماري علي الكعبي مرسلة : مشتاقين شسوّيتو لي و خلّيتو لي القبله اثنين !! وحده لربي و وحده لكلبي و حبكم دنيه و شِرعة دين بيه غيبتكم تلعب جوله بلهفة روحي و نبضة كلبي , و ماي العين ــــــ مرسلة : نسأل نسأل عالما يسأل غصباً عنّا نحبكم موت عطشانين , و نرضع بالحب عطر الجنه و ليها نفوت ابعاد و يمّي بيقضه و حلمي احبابي كبالي بصوره و صوت ــــ مرسلة : نسأل ردنه اعله الما يسأل كلناله اسمر , ظل يتمندل !! ..... يالهندي الأحمر !! يَسمَر ياللي شمحلاك اكفًَرنه و حبّينه اوصافك عمي اشدعواك ؟ رد كلبي العايف حالي و طاير ويّاك !! البقية ليوم استراحة ثانية و عنكود عنب لو ماعون كرزات جديد خاتمه اليوم بشفافي لسّه عطور ....وردات الخدود و بكلبي ضيم فراك .... متعدّي الحدود   كتب بتأريخ :  الثلاثاء 07-04-2015     عدد القراء :  3852       عدد التعليقات : 0