الانتقال الى مكتبة الفيديو

 
إمشي ورا اليبچّيك
بقلم : إحسان شمران الياسري
عرض صفحة الكاتب
العودة الى صفحة المقالات

يوم دخل الإرهابيون مدينة الموصل، ثم تمددوا وما زالوا في مواجهة القوات الأمنية ومسانديها من الحشد الشعبي والعشائر والتحالف الدولي، ظلت حكاية أبوگاطع (إمشي ورا اليبچّيك) تراودني كل يوم، فأتساءل عن حجم الغفلة التي وقع فيها الجميع، ابتداءً من قيادة الدولة العليا حتى أصغر قائد ميداني: هل كنا مثل جماعة «حمود الذرب»، لا نقدّر قوة العدو، او قوتنا، فوقع الذي وقع؟

لقد ركز أبوگاطع في تلك الحكاية على أهمية الصدق في العلاقة الجبهوية، وتحديد الامكانات والاحتياجات دون تضخيم او استهانة بالعدو.. واظنه كان يغمز المتزلفين للسلطة وهم يظهرون لها الأمور على غير حقيقتها، وهو ما أدى بعد نحو عقدين من السنين إلى اطلاق سلسلة الكوارث على يد السلطة.

فهو يروي على لسان خلف الدواح قصة حمود الذرب:

ذيچ السنه، حمود الذرب ـ ريّس عشيرة ـ بعده ولد شاب زاهية له الدنيا.. صارت بينه وبين جيرانه طلابه.. وصار حچي أغبر ينقلونه للطرفين.. وما اطوّلها عليكم وصلت لتعليجة البيارغ.. وحوَرَبْ المحورِب. وطگّن الچيلات.. فإذا ربع حمود الذرب طاروا بنص ساعه.. وتفلّشت جيمتهم.. وصارت حچايتهم يتسولف بيها.

حمود الذرب لمّ ربعه بالمضيف اللي چانوا يمشون وياه وينادمونه ويشيرون عليه، ونشدهم: ولكم ليش هيچ، سويتونا مضحكة للوادم؟ نص ساعة ما صبرتوا بملازمتكم؟

جاوبوه كلهم: محفوظ هُمه أكثر منّا، وتفگهم اجدد من تفگنا، وفشگهم كرخانه واحنا فشگنا اشدادة بيت وادي!

صاح بوجوههم: چا ليش گبل العركه ما حچيتوا الصدگ؟ ليش من چنت انشدكم اتجاوبوني زلمنه أكثر وتفگنه امضى وفشگنه كرخانه أبو لگيطه.. وغير وبعد من هالسوالف اللي سوّنلي جنحان؟!

جاوبوه كلهم، وروسهم للگاع: محفوظ شفناك هاوي العركه!!

ويواصل خلف الدواح نصائحه لرفاقه عن العمل الجبهوي: هسه، اتريدنا ما نحچي الصدگ، ونفك العيون على كل عوز؟ ليش؟ چا احنا غير مثل كل الوطنيين شايلين دمنا على اچفوفنا وحاطين العركه على عيونا. واليجبل على هيچ عركة لازم يكون متگفّض ما عنده كل عوز. احنا موش من الناس اليگولون (شفناك هوّاي العركه)، احنا من أهل العركه ومستعدين لبارودها ورصاصها.

وألتمْسَك دوم دوم اتذكر المثل اليگول: امشي ورا اليبچيك.. ولا تمشي ورا اليضحچك!

  كتب بتأريخ :  الثلاثاء 21-04-2015     عدد القراء :  1779       عدد التعليقات : 0