يابو مكبل ِمري و ضويات
والفَي
و الشمس
و الماي
يتلالن عليك زلوف
يا ضحكه و براد وأوف
شوَّكنه الخيال معرّس تمر بيه
و هودجنه بطرحته
و نطرة الزافوف
مر
وانتل رفيف الروح
يترادف غنه و صفكة عرس
و دفوف
لملمنه لشتالك من حصاد الضيم
وانثرنه بشواطي و ديم
ننبع عالدرب :
يا وي هلا بهالشوف
يحبيّب , ولا مر غيرك احبيِّب
يا ضي العين , ومن العين متغيِّب
ضواك بياكتر ؟
و بيا جرح مريوف ؟
لا يمنه ابسِما يلالي
و لا بجروحنه يبالي
وإلك خذنه الهوى بلا مستحه
و لا خوف
يَلَن ذكرك نثاث الروج
و خيالك لِضَم فَي لصريفتنه
و حنايه و طوف
ليـ.. نكبر سوه و وصلك جَزُر لا مد ؟
ليه رمل الشماته
لموح جيتك حد ؟
و ليمته بعطشنا نطوف ؟
و انت الفيض
يا فيض المحنه الما تلمه جروف
يا البالظن مِري و ضويات
و اتشاوَف عمر
وجه المحاسن بيك
يالمامش كسر يطفيك
ورَّجنه اعله راي اوياك